Luke 1

LUK RIITA DIITA MAJIN TIYOPILAS RIINA HEECHIREK YAR

1Tiyopilas, sen. Nokwapa nokwapa ma ye notaka tar otiir boboyen ye eena je keyi hechar. 2Tasiir nedii ma yecha diita boboy hechi sawotar. Sawotarek, keyir ma yecha meejichi keyi tar. Nota eechaba meejir. 3Meejitarek, ada diita boboyen mashi na apa hehar hikichiniga an apa hikitu eeta kepi ada diita meejir maji miina hehar keyichik. 4Miipa miina maji poko tar majin miipa hehar siikiin hikiken, eena ada miina diita majin keyichichu.

UKU YEECHIR JON RIINA YIMOWUR MAJI

5Eeta nediik Herot riita Judia aka tabo yima tarek opelen otii tar ma por tar. Riiti he eeta Sekaraia. Riiti opelen otii tar magwi, eeta Abaisa. Riiti mima siiti he eeta Ilisabet. Siiti magwi ye eeta Eron riiti magwi. 6Piiriita tarek, piiriita yo kepin otii tarek, God riita her. Piiriita God riiti lon, riiti majin hehar somowutar. 7Piiriita yikapwa biish. Siita makwo ma tar. Eena yikapwa biish. Piiriita apoko saba siir.

 8Nedii pochi Sekaraia rii opelen otiitar ma tari, rii God riiti yon otii tar. Riiti yo nedii tarek, rii otiitar. 9Opelen otii tar ma yechi otii tar abon riita somowu tari, aboga hisiiri, riita God riiti aka wok ichiniga kwowa ya tar boboyen cheyek tukutar. 10Tukutar nediik ma mima ye sabak tarek, ye God riina maji batar. 11Maji batarek, Sekaraia riita kwowa ya tawa boboyen tukutar cheyek mam yepak siitii tarek, God riiti ejel por rii riitak yar. 12Yarek, Sekaraia rii hechi nubu nubuchi akiir.

 13Akiirek, ejel rii eecha wor, “Sekaraia, opoche akiitanakech. Good riita miiti woher majin meejirek, miiti mima Ilisabet, siita hoye yikapwan yimowukiita. Yimowunak, riiti hin napa eecha haba ta, Jon. 14Diita yikapwa riin yimowunak kichi inyaka kwoya hikikiita. Nokwapa nokwapa ma mima yechi inyaka kwoyawoy hikitakiita. 15God riita riina mey maka hewak, riita harapa ma siikiita. Riita wiski, wain akasakech. Riina yimowunak, Holi Spirit riina takiikiisiitakiita. 16Riita nokwapa nokwapa Isrel ma mima yenya yechi Harapa yechi God riina awasen dareboyekiita. 17Ilaija riita God riitaka hapaga ichawaga, diita ma rii eechaba God riiti miy somak ikiita. Riita apoko yenya yaya yechi yikapwaka eecha heechikiita. God riina nasowoye tawa ma yen riipa dareboytakiita. Dareboy tanak, ye inyaka kepi hiki tawa ma yechi inyakan yakiita. Riipa God riiti ma miman Harapa riina sayarechikiita.”

 18Sekaraia rii ejel riina wor, “Boyega ada hikikiita diita maji siikiin batawey? Ada apoko saba ma siir. Eeji mima eeta apoko saba siibar.” 19Ejel rii riina awasen wor, “Ada Gebriel. Ada God riiti miy somak siitiito. Diita hadabas majin miina sawoken eena riita ana heechirek yar. 20Wowak, ada sawowa maji eeta God riiti nedii sokwakiita. Miita ada bawa majin meejikasakech. Eena miiti kuja diimiikiita. Miita saka hiki siitiichiwak, eena miita kuja saka bakiitawak. Ada miina bawa maji komas siikiin sokwanak, miita kawka kuja bakiita.”

 21Diita nedii ma mima yecha Sekaraia riina kowutar. Kowuchiniga yecha hikichi kapo boyewak rii God riiti lotu akak eechaba eechaba tar. 22Riita sabak yarek, rii yenya maji saka batarek, rii abatar. Eena yecha hikitar rii anada boboyen lotu akak eeka her. Maji saka worek, rii tapabak maji mukuchir. 23Sekaraia riiti lotu akak yo otii nedii hamachi rii riiti akak awasen ir. 24Komas riiti mima, Ilisabet, sii yikapwan kiyatar. Kiyaniga sii siiti akak niiwiika yokotapa eeka siir. 25Sii eecha wor, “Apa eeta Harapa rii ana kwoya hecho. Apa riita eeji hiibiyan yeechi rabowa.”

JISAS RIINA YIMOWUR MAJI

26Ilisabet sii 6 niiwiika yikapwa poche kiyatarek, God rrita ejel Gebriel riina heechirek ir. Galili nosape akaman siiti hi Nasaret, eeka heechirek ir. 27Irek, omunyegu mima pochin siitaka yar. Ma por tarek, riiti hi, Josep, riita yak tawa miman eena hisiir. Josep riiti wayega eeta Devit. Omunyegu mima siiti hi eeta Maria. 28Eeta ejel rii siitaka yarek, rii siin eecha wor, “Sen apa. Na eshar ta. Eeta Harapa nijaka tawa. Tawak, rii ninya rukusiichiniga yeyada har.” 29Maria siita ejel sawotar maji meejichi nubu nubu tarek, sii maji mun hiki tar. 30Worek, ejel rii siina eecha wor, “Maria, nija opoche akiitanakech. God riita ninya keena harapa rukusiito 31Nija awi siikiita. Nija awi siinak, hoye yikapwan yimowukiita. Yimowunak, riiti hi Jisas na haba ta.

 32
  • Rii harapa siikiita. Riina harapa howuk tawa God
  • rii yikapwa habatakiita.
  • Eeta God riita riina aka tabo yiman otiikiita. Riiti
  • wayega, Devit rii tarega, rii eechaba takiita.
 33
  • Tanak, rii Jekop riiti yakapwan eechaba eechaba
  • neeki yesokwakiita.
  • Riiti kigdom eechaba eechaba takiita. Hamakasakech.
    •  34Worek, Maria sii meejichi ejel riina wor, “Ada omunyegu mima tawa. Ada makasakech. Boyega diita boboyen ada siikiita?” 35Eeta ejel awasen wor, “Eeta Holi Spirit riita nijaka yakiita. Yanak, God riiti hapaga otii tawa boboy ninya gamukiita. Eena diita kepi yikapwa riina God Riiti Yikapwan habatakiita. 36Niji yakaa, Ilisabet, siina na hiki ta. Sii eeta apoko saba mima siir. Siirek, ma ye eecha wocho, sii keena yakapwan saka yimowukiitawak. Wowak, sii yikapwan kiyato. Yokotapa abo yokotapa pochi niiwiika siir. 37God rrita eyey boboy keena otiikiita.” 38Maria sii eecha wor, “Ada Harapa riiti yo otiitawa wakasa mima. Miita bawa majin wowey, sa way ta.” Worek, ejel rii heechi ir.

    MARIA SII ILISABET HEKEN YAR MAJI

    39Komas Maria sii boboyen sayarechi ameya heechi kwowuk tar eemek heechi ir. Judia nosapek ir. 40Sekaraia, Ilisabet piiriiti akak ir. I hechi Ilisabet siina woshiar. 41Woshiarek, Ilisabet sii meejirek, eeta yikapwa rii siiti biik tari, nyegiirabor. Holi Spirit rii yarek, Ilisabet siina takiikiisiirek, 42sii harapa uwar, “Nija akar eyey mimaka tari, God riita nijaban keena rukusiito. God riita niji yikapwan keena rukusiito. 43Boyewak diita boboy eeta ana yawak, eeji Harapa riiti nokwapa ana hek yawa? 44Ada nija ana woshiar majin meejiwak eeji yikapwa eeji biik tari, ameya rii kwoya woy hikichi, nyegiirrabor. 45Nija God riita ninya wochirek yar majin sokwaken hiki siitiichiwey, niji inyaka kwoya woy hikikiita.”

    MARIA SII HOKWA CHICHAR

    46Maria sii eecha wor,

    • “Eeji wopu eeta Harapa riiti hin yesokwato.
     47
  • Eeji yesokwa yichi tawa God riita otiirek, eeji
  • inyaka eeta kwoya woy hikitu.
    •  48
  • Ada God riiti kubuchey wakasa mima tawey,
  • rii ana hikitar.
  • Apa na komas eyey ma mima yecha eecha habatakiita:
  • Ada eeta God riita rukusii tawa mima.
    •  49
  • Harapa otii tawa God riita harapa boboyen ana
  • otiichicharek eena ana eecha habatar.
  • Rii ti hi eeta Holi.
    •  50
  • Ma mima mukaw mashi tarek, apa tawak, komas
  • tabatawak, riita riiti hehar otii tawa boboyen eena
  • God riina akii tawa man eena mukuchichu.
    •  51
  • Riita riiti hapaga tawa tapan mukuchir.
  • Wohipi tawa ma yechi inyaka otii hiki tawa boboy
  • otiirek, riita yenya otii poy pakar.
    •  52
  • Rii harapa akii tabo yima yenya dagiir poyer.
  • Wok woy tawa ma yenya riita yesokwar.
    •  53
  • Rii eecha ha tawa ma yenya hadabas aboboyen
  • takiikiisiir.
  • Ye yaka tawa ma yenya wochirek ye sobo ir.
    •  54
  • Riita noti wayega yenya wotar majin rii yesokwar.
  • Riiti wakasa ma, Isrel, yenya rii kiyatayek yar.
    •  55
  • Rii Ebraham riina hehar rukusii tari saka abosuchirek,
  • Rii Ebraham riiti yikapwan yenya eechaba eechaba
  • saka abosuchitarek.”
    •  56Worek, Maria siitaq niiwiika piiriichar kaka siirek, sii Ilisabet siina heechi siiti akamaka awasen ir.

    UKU YEECHIR JON RIINA YIMOWUR

    57Ilisabet yimowur nediik yarek, sii hoyey yikapwan yimowur.

     58Yimowurek, siiti bana bana tar ma siiti magwi Harapa riita siina kepi otiitar boboyen ye meejichi yaniga siitaka maji kwoyawoy batar.

     59Yikapwa rii 8 yadii tarek, yecha sapi dagii rabok yar. Yarek, yecha riina hin habak Sekaraia apoko riiti hin, eena waga habatar. 60Worek, riiti awi eecha wor, “Yaho. Sekaraia habakasakech. Riiti hi eeta Jon.” 61Yecha awasen siina eecha wor, “Niji magapana diita yikadey hi takasakech.” 62Worek, yecha eepi riina tapa maji batawak woher, “Kapo boy riiti hin habatakiita?” 63Worek, Sekaraia riita jeyn yaken woher. Wohechi keyirin kadiirek eecha wor, “Riiti hi eeta Jon.” Worek, eyey nyegiirabor. 64Eeta nedii Sekaraia rii kawka maji sokwarek kawka maji batar. Baniga, rii God riiti hin yesokwatar. 65Worek, bana bana tar ma ye harapa akii tar. Worek, diita otiir boboy Judia kwowu tar eemek eeka i ye ya tar. 66Eyey ma mima ye meejichi hikichi woher, “Kapo boy diita yikapwa riipa boy siikiita?” Eeta geenyek siir God riiti hapaga boboy eeta yikapwa riitaka siir.

    SEKARAIA RIITI KOMAS SOKWAK TAWA MAJI

    67Riiti eepi, Sekaraia, riina Holi Spirit yaniga takiikiisiirek, Sekaraia rii komas sokwak tawa majin sawor:

     68
    • “Eeta Harapa, Isrel yechi God, riina na kwoya
    • babatanak na kwoya ba hiki ta.
    • Rii riiti ma mima kiyatayek yar. Yenya heemachik
    • eena yar.
     69
  • Riita otiirek, yesokwa yicha ma sokwar.
  • Sokwarek, riita nona yesokwa yichir.
  • Dii eeta Devit, God riiti wakasa ma, riiti neja.
    •  70
  • Mashi mashi riita riiti piirapet, maji sawo tar
  • ma kepi, riita yechi kujak eecha wor.
    •  71
  • Riita wotar, nona o ana pichawa ma yecha nona dagiir
  • poyek otii tanak, riita nona yesokwa yichikiita.
    •  72
  • Riita noti wayega yenya eecha wor, “Ada yenya
  • mashi wotar majin saka abosuchikiitawak.
  • Ada kwona hehar rukusiitakiita.
    •  73
  • Riiti noti wayega Ebraham riina majin wotar,
    •  74
  • o ana pichawa ma yecha nona dagiir poyek otii tanak, riita
  • nona yesokwa yichikiita.
  • Riita wotar, nota riiti yon otiichinyey, nota sak
  • akiikiitawak.
    •  75
  • Riita wotar, riita nona riiti miyik henyak, nota eechaba
  • eechaba kepi takiita. Eechaba eechaba hehar takiita.
    •  76
  • Miita eeji yikapwa.
  • Howuk tawa God riiti piirapet miina harapa habatakiita.
  • Miita Harapa riina mapo ikiita. Mapo iniga Harapa
  • riiti nobon takiichikiita.
    •  77
  • Takiichinyak, riipa God riiti ma miman yenya yesokwa
  • yichiken eena wokiita. Yechi kapasek boboyen bachi
  • poyeken eena wokiita.
    •  78
  • Noti God rrita nona hehar rukusiito.
  • Riipa otiitanak, hevenek tawa haba nona
  • okoreechichakiita.
    •  79
  • Niyi kiyik yichawa man, hak otii tawey, haba
  • eeta yenya okoreechichakiita.
  • Okoreechichanak, hechi noti yatii kepi wey tawa nobok
  • piitiikiita. Wonyak, nopa kepi hikichi ikiita.
    •  80Eeta yikapwa, Jon, sokwatar. Sokwatarek, riiti spirit hapaga sokwar. Riita me biish tar eemek akama biish tar eemek, eeka yichar. Yi yi yicharek, komas nedii riita Isrel ma mima yechi miy somak ya sokwar.
    Copyright information for KMO